రెండు జీవితాలు

రెండు జీవితాలు

కొన్నిసార్లు భలే మాట్లాడతాము
వాక్యమొక విషయం చెబుతుంది,
పదాలు మరొకటి చెబుతాయి

సంభాషణ ఒక సంగతి వివరిస్తుంది,
ఉచ్ఛారణ మరేవో గుసగుస లాడుతుంది

కొన్నిసార్లు భలే పనులు చేస్తాము
పని ఒకదారిన కనబడుతుంది,
ఫలితం మరోదారి చూస్తుంది

కొన్నిసార్లు మనం వింతగా ఉంటాము
ముందు ఒకందుకు నవ్వుతాము,
వెనుక మరొకందుకు నవ్వుకుంటాము

పైకి ఒకందుకు ఏడుస్తాము,
లోపల మరొకందుకు రోదిస్తాము

చాలాసార్లు మనం
రెండు జీవితాలు జీవిస్తాము
మనల్ని రెండు చేసుకుని,
రెండు సగాలు కోల్పోతాము
ఎంతకూ నిండని రెండు సగాలలో
అర్థంలేని విషయాల సున్నాలు నింపుతాము

ఎప్పుడైనా అరుదుగా
ఒక పసివాడి నవ్వో,
పూల వికాసమో,
పక్షుల ప్రవాహమో
మనని కాసేపు ఒకటి చేసి,
మనని మనతో నింపి దీవించి వెళతాయి

ఎప్పుడైనా అరుదుగా
మనం ఏమరపాటున దయగా,
నిజాయితీగా ఉన్న క్షణాలు,
నిండైన క్షణాలు
మనకు ఇంత శాంతిని ప్రసాదిస్తాయి,
మనల్ని సారవంతం చేసి మాయమౌతాయి.