గుస గుస్సా!

గుస గుస్సా!

‘హేయ్ ర ష్మీ ... ఈ విషయం తెలుసా?
రాజేష్ పాకెట్‌మనీ అడిగితే
వాళ్ల నాన్న చెంపదెబ్బ ఇచ్చాట్ట’’
‘‘అవునా? ఎక్స్‌పెక్ట్ చేశా. వాడికి అలాగే కావాలి.
సరేగానీ నీకొకటి చెప్పనా...
మన సైన్స్ టీచర్‌కి నాగ్ అంటే పిచ్చి
మొన్న తన బుక్స్‌లో నాగ్ ఫొటో చూశా’’
‘‘పిల్లలూ ఏంటా గుసగుసలు?
బుద్ధిగా చదువుకోక’’
‘‘అమ్మో మమ్మీ విన్నట్టుంది. స్టాప్ స్టాప్...
నెక్ట్స్ గాసిప్... ఆఫ్టర్‌ది బ్రేక్...’’
పిల్లల గుసగుసలు, పేరెంట్స్ ‘గుస్సా’లు
ఎలా బ్రేక్ వేయాలి? ఈ వారం పేరెంటింగ్‌లో....

‘ఏడవతరగతి అమ్మాయి ఆత్మహత్య... ’అని ఇటీవల పేపర్లో న్యూస్. వివరాల్లోకి వెళితే... సుప్రజ (అసలు పేరు అది కాదు) ఏడవ తరగతి చదువుతోంది. గ్రౌండ్‌లో ఆడుకుంటుండగా ఆ అమ్మాయికి 500 రూపాయల నోటు కనిపించింది. ఎవరిదా! అని చూస్తుండగా ప్రిన్సిపల్ గ్రౌండ్‌లో స్టూడెంట్స్‌తో మాట్లాడుతూ కనిపించారు. ప్రిన్సిపల్‌దే అయి ఉంటుందని ఆ నోటు తీసుకొని దగ్గరకు వెళ్లేలోగా ప్రిన్సిపల్ ఏదో పని ఉండి హడావుడిగా బయటకు వెళ్లిపోయారు. ఈ లోపు బెల్ మోగింది. ప్రిన్సిపల్ వచ్చిన తర్వాత ఇవ్వచ్చు అనుకొని క్లాస్‌రూమ్‌కి వెళ్లింది.

సుప్రజ దగ్గర 500 రూపాయల నోటు చూసిన క్లాస్‌మేట్స్ గుసగుసగా మాట్లాడుకోవడం మొదలుపెట్టారు. పిల్లల మాటలను విన్న సుప్రజను టీచర్ నిలదీసింది ‘ఎక్కడ దొంగిలించావో నిజం చెప్పు’ అని. తనకా నోటు దొరికిన విషయం చెబుతున్నా టీచర్ పట్టించుకోలేదు. ప్రిన్సిపల్ వచ్చిన తర్వాత ఆ డబ్బు రిటర్న్ ఇచ్చినా, క్లాస్‌మేట్స్ దొంగ అని తన వెనక అనుకోవడం, గేలి చేసే మాటలు మానకపోవడం కొన్నిరోజులుగా జరుగుతూనే ఉంది. ఆ అవమానాన్ని తట్టుకోలేని సుప్రజ ఇంటికి వెళ్లి ఒంటిపై కిరోసిన్ పోసుకొని, నిప్పంటించుకొని ఆత్మహత్య చేసుకుంది.

పూర్ణ లెవంత్ క్లాస్.. అందంగా ఉంటుంది. అందరితోనూ చనువుగా మాట్లాడుతుంది. చదువులో మంచి మార్కులు సంపాదిస్తుంది. ఇది కొంతమంది క్లాస్‌మేట్స్‌కి కంటగింపుగా తయారైంది. పూర్ణకి బాయ్‌ఫ్రెండ్స్ ఉన్నారని, టీచర్స్‌తో క్లోజ్‌గా ఉంటుందని, అందుకే మార్కులు బాగా వస్తాయని క్లాస్‌మేట్స్ మాట్లాడుకోవడం వింది. పూర్ణ కనపడితే చాలు కించపరచడానికి ఏదో ఓ కామెంట్.. నలుగురు చేరి గుస గుసగా మాట్లాడుకోవడం. తననేదో జూలో జంతువులా చూస్తున్నారని భావించుకున్న పూర్ణ డిప్రెషన్‌కు లోనైంది. అదే స్కూల్ బిల్డింగ్ ఫోర్త్ ఫ్లోర్ నుంచి దూకేసింది.

తమ సమక్షంలో లేని వ్యక్తి గురించి మంచిగానో, చెడుగానో ఇంకొకరికి చెప్పడాన్ని గాసిప్ అంటారు. గాసిప్స్ మనలో ఓవిధమైన ఆసక్తిని, ఉత్కంఠతను కలిగిస్తాయి. ఇదిగో పులి అంటే అదిగో తోక... అన్నట్లుగా మాటల్లోనే లేనిది ఉన్నట్టుగా, ఉన్నది లేనట్టుగా పుకార్లు షికారు చేస్తూ ఉంటాయి.

‘గాసిప్స్ - పిల్లల ప్రవర్తన’ అనే అంశానికి సంబంధించి యూనివర్శిటీ ఆఫ్ వాషింగ్టన్ సైకాలజీ ప్రొఫెసర్ డా.కరిన్‌ఫ్రే ఆధ్వర్యాన 600 మంది స్కూల్ పిల్లలపై ఓ స్టడీని నిర్వహించి, నివేదికను రూపొందించారు. ‘పిల్లల్లో దుందుడుకు ప్రవర్తనకు గాసిప్ బీజంగా మారుతుందని, ఇది శారీరకంగా ఇతరులను బాధించడానికీ వెనకాడనీయటం లేదని’ తెలియజేశారు. అంతేకాదు ‘ఈ అలవాటు వల్ల ఇతరులను టీజ్ చేయడం, నిక్‌నేమ్‌లు పెట్టి వేధించడం, రూమర్స్‌ని వేగంగా స్ప్రెడ్ చేయడం, కబుర్లతో పొద్దుపుచ్చడం వంటివి పిల్లలకు త్వరగా అలవడతాయని’ ఈ నివేదికలో పొందుపరిచారు. రోజులో ఐదు నిమిషాలు ఇతరుల గురించి చెప్పడంతో మొదలైన ఈ అలవాటు ఆ తర్వాత పది సార్లయినా గాసిప్ చేయకుండా ఉండలేకపోవడమనే స్థాయికి చేరుకుంటారని, అందుకే ఈ అలవాటుకు ఆదిలోనే అడ్డుకట్ట వేయాలని సూచించారు.

ఏ వయసు నుంచి..?

గాసిప్‌కు అమ్మాయిలు, అబ్బాయిలు అనే తేడా ఏమీ లేదు. ఎదుటివారిని మానసికంగా దెబ్బతీయడం అనేదే ఇందులో ప్రధానాంశంగా మారుతుంది. సాధారణంగా 12 నుంచి 14 ఏళ్ల వయసులో మొదలయ్యే ఈ అలవాటు అలాగే కొనసాగి కొందరిలో ముప్పై ఏళ్లలోపు ఆగిపోతే, కొందరిలో జీవితాంతం ఉండిపోతుంది. గాసిప్స్ చెప్పుకోవడం సరదాగా, కాలక్షేపంగా భావిస్తుంటారు చాలామంది. కాని దాని ప్రభావం వారి మెదళ్లలోకి కూడా చొచ్చుకుపోతుంది. ‘పిల్లల్లో అయితే మెచ్యూరిటీ లెవల్ పెరగకపోవడం, పెద్దల్లో మెచ్యూరిటీ లెవల్ తగ్గిపోవడం వల్లే గాసిప్ చేయడం జరుగుతుంటుంది. సున్నిత మనస్తత్వం కలవారిపై ఇది తీవ్రప్రభావం చూపవచ్చు. డిప్రెషన్‌కు గురిచెయ్యడం, ఆత్మహత్యలకు ప్రేరేపించడం వంటి ప్రమాదాలకూ చేరువచేయవచ్చు’ అంటున్నారు మనస్తత్వ నిపుణులు.

నెగిటివ్ స్పిరిట్

సాధారణంగా తల్లిదండ్రులు, ఇతర కుటుంబసభ్యులు తమ చుట్టుపక్కల వారిమీద గాసిప్స్ చెప్పుకోవడాన్ని పిల్లలు చూసి దానినే అనుకరిస్తుంటారు. పోను పోను అదే అలవాటుగా మారిపోతుంటుంది. ఈ అలవాటు ఒకే వయసు వారిలో ముఖ్యంగా పియర్ ప్రెజర్ ఉండే పిల్లల్లో ఎక్కువగా చూస్తుంటాం. ఎదుటివారు తమ కంటే ఏ విషయంలో అధికంగా ఉన్నా భరించలేక, సదరు వ్యక్తుల గురించి చెడుగా చెప్పి ఏదో విధంగా తమ ఇగోను సంతృప్తిపరుచుకుంటూ ఉంటారు. వారి కన్నా తామే అధికులమని చెప్పుకోవడానికి ఇలాంటి గాసిప్స్‌ను విసృ్తతం చేస్తుంటారు.

గాసిప్స్-పిల్లలకు చేసే చెడు గురించి సైకియాట్రిస్ట్ డా.శేఖర్‌రెడ్డి మాట్లాడుతూ-‘రాజమండ్రిలో టెన్త్ క్లాస్ చదువుతున్న ఓ అమ్మాయిని ఇటీవల కౌన్సెలింగ్ కోసం తీసుకొచ్చారు. స్కూల్‌కెళ్లమంటే అదే పనిగా ఏడ్వడం, ఫిట్స్ వచ్చి పడిపోవడం, ఆ సంఘటనలతో ఆ అమ్మాయి తల్లితండ్రులు భయపడిపోయేవారు. విషయం ఏంటంటే క్లాస్‌లో ఎప్పుడూ ఫస్ట్ వచ్చే ఆ అమ్మాయి గురించి చెడుగా మాట్లాడటం మొదలుపెట్టారట. గాసిప్స్ పెద్దలకు తేలికగానే కనిపించవచ్చు. కాని పిల్లలకు అవే జీవన్మరణ సమస్యల్లా కనిపిస్తాయి’అంటున్నారాయన. ఇలాంటి పరిస్థితుల్లో స్కూల్ టీచర్లతోనూ, ప్రిన్సిపల్‌తోనూ మాట్లాడి సమస్యను చక్కదిద్దడమో, లేక స్కూల్‌ను మార్చడమో చేయక తప్పదని సూచిస్తున్నారు.

ఒకరి గురించి చెడుగా మాట్లాడుకోవడం వల్ల మనకు కలిగే ప్రయోజనం ఏమీ ఉండదు. పైగా ఇలాంటి పనుల వల్ల కాలం వృథా. నిజం నిర్ధారణ అయినప్పుడు గాసిప్ చేసిన వ్యక్తికి బ్యాడ్ నేమ్ రావచ్చు. పిల్లలు గాసిప్స్‌కు అలవాటు పడితే మొదట స్కూళ్లు, ఆ తర్వాత కాలేజీలు, భవిష్యత్తులో ఆఫీసులపైనా ఎఫెక్ట్ పడుతుంది. భూత, భవిష్యత్, వర్తమానాలపై ప్రభావం చూపే యాంటీగాసిప్స్ బారిన పిల్లలు పడకుండా పెద్దలే జాగ్రత్తలు తీసుకోవాలి. చెడు వినవద్దు, చెడు అనవద్దు... అన్న నీతిని పెద్దలు ఆచరిస్తే పిల్లలు అనుసరిస్తారు.

గాసిప్‌కి చెక్

1. ఇంట్లో పేరెంట్స్, స్కూల్లో టీచర్స్ పిల్లల కబుర్లను ఓ కంట గమనిస్తుండాలి.

2. గాసిప్స్ తమ దృష్టికి వచ్చినప్పుడు టీచర్లు లేదా తల్లిదండ్రులు తప్పనిసరిగా కౌన్సెలింగ్ ఇవ్వాలి.

3. ఒక వ్యక్తి గురించి చెడుగా మాట్లాడం వల్ల కలిగే నష్టాలేంటో వివరించాలి.

4. ఏ గాసిప్ అయినా లిమిట్స్‌లో ఉంటేనే అందం, ఆనందం అనే విషయాన్ని పిల్లలు అర్థం చేసుకునేలా చెప్పాలి.

5. ‘ఈ రోజు మీరు గాసిప్ చేశారు, రేపు మిమ్మల్ని వేరే గ్రూప్ వాళ్లు గాసిప్ చేస్తే ఎలా ఉంటుందో ఆలోచించండి...’ అంటూ కౌన్సెలింగ్ ద్వారా చెప్పగలగాలి.

6. పిల్లలు మూడీగా, డిప్రెస్‌డ్‌గా ఉండటం, కుటుంబసభ్యులతో సరిగా మాట్లాడకపోవడం, స్కూల్‌కి వెళుతున్నప్పుడే కడుపు నొప్పి రావడం, జ్వరం వచ్చిందనో, తలనొప్పి వచ్చిందనో చెప్పడం... వంటివి గమనించినప్పుడు విషయం ఏంటో అడిగి తెలుసుకోవాలి. స్కూల్‌లో గాసిప్ చేస్తున్నారని తెలుసుకున్న వెంటనే టీచర్స్‌ని కలిసి సమస్యను వివరించాలి.

7. టీచర్లతో చెప్పినా స్కూల్‌లో గాసిపింగ్ ఎక్కువగా ఉందని గమనిస్తే అమ్మాయి/అబ్బాయిని ఆ స్కూల్ నుంచి మరోస్కూల్‌కి మార్చడం మంచిది.

8. గాసిపింగ్ వల్ల బాధపడే పిల్లలను ఒంటరిగా వదిలేయకూడదు. కావలసిన మనోధైర్యాన్ని ఇవ్వడం, సైకియాట్రిస్ట్‌లతో కౌన్సెలింగ్ ఇప్పించడం వంటివి చేయాలి.

ప్రోత్సహించండి!

గాసిప్ వల్ల చెడు మాత్రమే కాదు మంచి కూడా ఉంది. సచిన్ టెండూల్కర్ విల్‌పవర్ గురించి, రెహమాన్ మ్యూజిక్ గొప్పతనం గురించి, కిరణ్‌బేడీ ధైర్యం గురించి... ఇలా ఎవరైనా జీవితంలో గొప్ప స్థాయికి ఎదిగిన వారి గురించి నలుగురు కూర్చొని మాట్లాడుకోవడం వల్ల ఆ విషయాలలో నుంచి స్ఫూర్తిని పొందవచ్చు. ఆ విధంగా తమలోని మంచి క్వాలిటీస్ ఏమున్నాయో వెలికితీయాలని, మెరుగైన ఫలితాలను సాధించాలనే తపన ఈ కబుర్లు వల్ల పెరుగుతుంది. బద్దకాన్ని వదిలిస్తుంది. పోటీతత్వాన్ని పెంచుతుంది. లక్ష్యాలను ఏర్పరుస్తుంది. ఎంచుకున్న లక్ష్యాన్ని చేరుకోవడానికి కష్టపడే తత్వాన్ని పెంచుతుంది. మంచి వ్యక్తుల గురించి మంచిగా మాట్లాడుకోవడం ద్వారా వారి చుట్టూ ఉండే స్నేహితుల్లోనూ మార్పు వస్తుంది. ఫలితంగా టీమ్ స్పిరిట్ పెరుగుతుంది. మంచి గాసిప్స్‌లో ఉండే మహత్మ్యం అది. అందుకని పిల్లల మధ్య ఆరోగ్యవంతమైన గాసిప్స్‌ని తల్లిదండ్రులు ప్రోత్సహించాలి.

టీచర్లూ కీలకమే!

ఉదయం నుంచి సాయంత్రం వరకు పిల్లలు ఉండేది స్కూల్లోనే. అందులోనూ ఇంట్లో వారికన్నా టీచర్లు చెప్పే విషయాలు వారికి కరతలామలకం. అందుకని టీచర్లు పాఠ్యాంశాలకు సంబంధించినవే కాకుండా ఎదుటివారిని గౌరవించడం, తిరిగి గౌరవం పొందడం వంటి విషయాలను తరచుగా చెబుతుండాలి.

- నిర్మలారెడ్డి, సాక్షి ఫీచర్స్ ప్రతినిధి